Algengar spurningar og svör varðandi kryddjurtaræktun:

 Ég er að rækta kryddjurtir í fyrsta sinn, eru einhverjar tegundir auðveldari en aðrar í ræktun?
SVAR:  Oft er talað um steinselju, graslauk, oregano ofl, en flestar aðrar tegundir eru einnig fremur einfaldar að eiga við. 

Kryddplantan mín er orðin veikluleg, greinarnar langar og mjóar.  Hvernig get ég hresst upp á hana?
SVAR:  Ef plönturnar eru orðnar slappar gæti ástæðan verið sú að birtan sé ekki næg og þá er gott að færa þær í sólríkari glugga.  Ef það dugar ekki (t.d. á veturna þegar birta er lítil) þá er gott að klípa framanaf greinum og láta plöntuna þétta sig aftur.  Snúið plöntunum af og til svo að allar hliðar fái birtu.

Hvaða kryddjurtir má fara með út í garð og hvenær ætti að færa þær?
SVAR:  Nánast allar tegundir, nema basiliku.  Ákveðnar tegundir krydda þrífast  m.a.s. betur úti en inni, t.d. steinselja.  Ef færa á plöntu út í garð er best að miða við miðjan júní, þegar hætta á kuldakasti er orðin hverfandi.   Nauðsynlegt er að herða plönturnar áður en þær eru fluttar á endalegan stað í garðinum.  Það er gert með því að setja þær út á daginn og taka inn að kvöldi, eða flytja þær út í vermireiti (beð með yfirbreiðslu).

Hvaða stað í garðinum er best að velja fyrir kryddjurtir?
SVAR:   Æskilegt er að velja stað þar sem plönturnar fá sem mesta sól og skjól.  Að öðru leyti má setja þær hvar sem er, t.d. í ker eða potta á svalir og verandir, eða beint í beð inn á milli blóma og runna.  Kryddjurtir geta einnig virkað sem vörn gegn skordýrum fyrir aðrar plöntur í garðinum.

Hversu mikið á ég að vökva kryddjurtirnar mínar?
SVAR:  Mælt er með er að vökva vel og sjaldnar, fremur en oft og lítið.  Gott er að stinga hendinni ofaní moldina til að kanna hvort rakinn nái vel til rótanna.